२८ सप्टेंबर २०२० रोजी स्वरसम्राज्ञी लता मंगेशकर यांनी ९२व्या वर्षात पदार्पण केले. त्या निमित्ताने, त्यांच्याबद्दलचे हे शब्द-चित्र... माय-लेकीनं काढलेलं...
..........
असे वाटते कधी तुझा स्वर
उंच नभातुन विहरत जातो
जातो अलगद येतो फिरुनी
नक्षत्रांचे गाणे गातो
असे वाटते कधी तुझा स्वर
खोल सागरी अथांग जातो
गूढ शांतता असते कधी तर
लहरी रौरव ऐकू येतो
असे वाटते कधी तुझा स्वर
जलधारांनी सचैल न्हातो
तृषार्त झाल्या भूमीला मग
अलगद अपुल्या कवेत घेतो
असे वाटते कधी तुझा स्वर
तलवारीसम लखलख करतो
रणभूमीवर धगधगणारी
रक्त तांबडी ज्वाला होतो
असे वाटते कधी तुझा स्वर
प्राजक्ताची पखरण करितो
शुभ्र सुगंधी फुले अर्पुनी
भणंग जोगी फकीर होतो
असे वाटते कधी तुझा स्वर
गाभाऱ्यातील नाद अनाहत
अनुपम कंपन कंठामधल्या
प्रार्थनेतला अर्थ भासतो
- डॉ. सौ. अपर्णा अजित बेडेकर
(#गोदातीर्थ)
